爱华网明珠台，相信广东，尤其系珠三角嘅朋友应该唔会陌生。哩个系一个带俾我好多欢乐嘅电视台。
佢——tvbpearl，明珠台。作为tvb旗下嘅一个专职播放欧美影视乐、体育赛事、动画等等，综合性好强嘅台，陪伴过好多人走过果段几乎只有电视是唯一娱乐嘅岁月。我就系其中嘅一个。可以咁样讲，令我认识日本嘅系翡翠台（迟D再讲哩个），而令我认识欧美嘅系明珠台。
唔记得系几时开始睇明珠台嘅啦，可以回忆到嘅系2年级果阵挂。果时屋企部电视仲可以收到粤语配音嘅电影，一到周六就准时转到明珠台。当时因为番学，所以佢一星期3部片只可以睇到星期六晚上果部，机会真系好少嘅，呵呵。
当然，晚上其他时段佢都有播电视剧嘅，听得最多嘅就系《X档案》啦，果阵哩部剧好红，连翡翠台嘅宣传都好多，耳边依然可以回荡起“莫探员”哩个词。不过我错过咗，当时唔识得睇美剧，作为学生仔，身不由己。
“好戏730”、“明珠930”哩两句，可以话系当时两台节目嘅最佳表现。“930”当然就系指明珠台电影嘅播放时间啦，时至今日，冇乜特别情况，每当周五、六、日哩个钟数开明珠台，就梗系播紧荷里活猛片嘅，呵呵。因此同佢无形间就形成一种感情，一星期唔见一次就好似少咗样嘢咁。
《石破天惊》、《空军1号》、《魔戒》、《夺面双雄》、《未来战士》、《职业特工队》、《盗墓迷城》、《盗海豪情》、《火海豪情》、《这个杀手不太冷》、《隔世救未来》、《最后武士》、《天魔特工》、《阿甘正传》、《月黑高飞》、《雷霆救兵》、《黑鹰15小时》、《回到未来》、《人工智能》······仲有好多好多，部部都系佢地悉心挑选出嚟嘅猛片，睇完之后回味无穷。
不过依家果种感觉就真系得回味啦。明珠台一直喺度改变，变得越嚟越好。而破坏哩种美好嘅就系内地嘅广电总局之流啦，收唔到粤语，广告乱咁插·····万恶嘅行为。
除此之外，仲有网络嘅冲击，各种新片未上映就有得睇。明珠台稍微新D嘅片要相隔3-4年先有得睇。当时好难得可以有咁样嘅机会嘅，通常每个月第一个星期日先会播一部，例如我记得07年作为“明珠首映4月钜片——《智能叛变》”咁，2004年上映嘅，要到2007年先有得睇，仲要系周日，所以话有几珍贵咧？
因为电影系喺电视台播，中间要经常卖广告，但丝毫冇影响我欣赏，相反，仲有一种饥饿营销嘅感觉，吊起你铺瘾咁，呵呵。哩D都系网上睇电影所冇嘅，俾唔到一个思考嘅空间，一下就过咗。所以，即使我依家可以用到电脑，用到网络，我时不时都会睇明珠台嘅。
睇完之后，仲可以理直气壮咁讲：“我睇嘅系正版电影”。呵呵。
